الأربعاء، ١٤ أبريل ٢٠١٠

لازم يأيدوا جمال مبارك طبعاً!

من زمان ما كتبتش بالعامية...بس لما إني نويت أتكلم عن الشارع وأهله فلازم أتكلم بلغته...علشان كده إعذروني المره دي وفوتوهالي:

*الشعب المصري زيه زي أي شعب في العالم...فيه الغبي والجاهل والمتطرف والمنافق...والمنافق ده هو الوحيد اللي كسبان على كل الأشكال والصور...لو فاكرين ان اللي عايزين جمال مبارك يمسك الحكم مش فاهمين تبقوا انتوا اللي مش فاهمين...اللي عايزين جمال اذكيا جداً أو أغبيا جداً ومافيش حلول وسط...الشيخ والكاهن اللي بيأيد جمال مبارك مستمتع بإستغلال السُلطة للدين وبإنه نجم نجوم المجتمع دلوقتي ببركة أفيون الشعوب...الشيخ والكاهن مسيطرين على الناس بشكل أقرب للتنويم المغناطيسي (سُلطة)...بياخدوا مرتبات من كلامهم وسلطتهم والمصادر كتيرة (فلوس)...وشوشهم وأصواتهم وتصريحاتهم ماليه الدنيا ومعبية القنوات والجرايد والإذاعات (شهرة)...كلمتهم سيف على رقاب البشر...إللي يطيعهم كأنما أطاع الله ورسوله (أي إله وأي رسول تبعهم)...وإللي يخالفهم يبقى خالف إجماع العلماء وليلة أهله سودا...على يد مين بقى؟ على يد الأغبيا والجهله والمتطرفين والحكومه نفسها!

*اللي عايزين جمال مبارك في منهم أصحاب مصالح لا يمكن يتخلوا عنها بين يوم وليله...موظف الحكومه الكحيان عارف انه لو بطل يرتشي هايجوع...مين سامحله يرتشي من غير قلق ولا صداع؟ الحكومه طبعاً! ليه؟ علشان الفاسد للفاسد كالبنيان المرصوص! طيب لو المرتب إتنفخ بقدرة قادر وبقى التلات أضعاف بس بشرط الرشوة تقف واللي يرتشي يتعلق...مين الخسران ومين الكسبان؟ مافيش خسران غير موظف الحكومه طبعاً...لأن مرتبه حتى لو بقى تلات أضعاف مش هايجيب رشوتين على بعض...ومين الكسبان؟ طبعاً المواطن اللي مش هايضطر يصرف دم قلبه علشان يخلص مصالحه في حين ان الموظف هايضطر يتعب من غير مقابل مباشر من المواطن...يبقى موظف الحكومه من الدرجه السادسه للوزير يدافع عن جمال مبارك ويؤيده ولا يبقى غبي ويعارضه؟

*مين قال ان معارضة جمال مبارك في صالح العمال والفلاحين؟ يقدر حد فيهم يفتح بقه بكلمه؟ مع انهم مطحونين وطلعان عين اللي جابوهم...بس خليك معايا كده...لو الفلاح والعامل صرخ وصوت وخبط برجليه على الأرض وقال مش عايزين جمال مبارك هايحصله ايه؟ العامل دلوقتي مالوش ديه...آخرته هايتطرد من مصنعه وهاياخد بالجزمه سواء بفصل تعسفي او بمعاش مبكر او بان رؤسائه يقرفوه في عيشته ويضيقوا عليه الطريق لحد ما يغور...وبدل ما كان عايش على الحركرك مش هايعرف يعيش من الأصل...طيب والفلاح؟ الفلاح غلبان أوي...الحكومه وفرتله الدش والموبايل وسهلوله الهجرة الغير شرعية وظبطوله المسائل مع وزارة الزراعه بحيث ان اللي يدفع يلاقي...دلوقتي بقى بيزرع ويقلع بالريموت كونترول...ولو لقى عيشته صعبه ياخد أول مركب على اليونان ولا إيطاليا ويرجع مليونير بعد ما يضيق على نفسه خمس ست سنين...وإوعوا تغركم حوادث الغرق...اللي بيوصلوا أضعاف اللي بيغرقوا...ولو الفلاح إعترض مش هايلاقي سماد ولا تقاوي ولا ريموت كونترول وهايمسكوا اللي بيهرب الشباب ويعملوا فيها السبع رجاله...ولما يفوق الفلاح هايجيبوله واحد تاني غير اللي مسكوه علشان يستمر مسلسل التهجير للجنات التي تجري من تحتها الأنهار في أوروبا

*طيب الشباب العاطل اللي مش لاقي ياكل هايأيد جمال مبارك على خيبة إيه؟ أقولك انا يا بيه...الشباب العاطل في منهم الشريف والمتربي والمتعلم...وده ماعندوش وقت لا يأيد ولا يعارض لأن رغبته الجنسيه واجعاه ومش لاقي فلوس يعيش بيها زي زمايله اللي بيشتغلوا وأهله مطلعين عينه علشان قعدته في البيت والبنت اللي بيحبها هاتتخطب لواحد غني زي الأفلام القديمة عديمة القيمة...يعني من الآخر هيكل بشري شبه عايش ماعندوش أمل ولا طموح وآخره يفكر يتجوز بعد تلاتين سنه كفاح...طيب والشباب اللي مش متربي ولا متعلم؟ دول بقى متظبطين...بيثبتوا العيال الصغيرة في موبايلتهم وفلوسهم من غير ما حد يقولهم بتعملوا إيه....بيضربوا بانجو بأرخص الأسعار وبيشربوا خمور مضروبه برخص التراب وبينزقوا بنات الشوارع تحت الكباري وفي الخرابات وواخدين حقهم بدراعهم وأسلحتهم وكمان مظبطين أفراد الشرطة حرّاس الوطن من أمناء ومندوبين وعساكر ومخبرين...ويا ويلهم لو إتكلموا في السياسة...واحد هايتشد والباقي هايحصلوه قبل أن يرد إليهم طرفهم...يبقى المصلحه فين؟ المصلحه مع إستمرار الوضع القائم لأن ده الضمان الوحيد للفلوس اللي ببلاش والمزاج الشبه مجاني وكسر القانون بالتظبيط مع القائمين على حمايته من الفاسدين

*رجال الأعمال والمرتاحين واللي عايشين في جمهورية مصر الأوروبية مش محتاجين كلام عن أسباب تأييدهم لجمال...الحجه الجاهزة علشان الإخوان لو مسكوا البلد هاتضيع...لكن الحجه الحقيقية ان النظام بيحافظلهم على مكاسبهم وبيحمي فسادهم وبيبارك تطلعيهم لدين أم اللي شغالين عندهم...يبقى يعارضوه ليه؟ الناس دي بتقول انهم علمانيين وليبراليين ومتفتحين...وممكن جداً يكون أغلبهم كده فعلاً...لكن الحقيقة إنهم مش خايفين من الإخوان اللي هايجيبوا حكم ديني ضد أفكارهم...وإلا ليه مش بيعترضوا على الحكم العسكري الديكتاتوري الغير علماني ولا ليبرالي اللي هو ضد أفكارهم برضه؟ الحقيقة المُره إنهم لو عارضوا جمال مبارك كل مكاسبهم هاتغور في داهية...مش هايقدروا يدوا العمال والموظفين اللي عندهم مرتبات بمزاجهم واللي مش عاجبه يروح بيتهم...ومش هايتقرفوا في عيشتهم بنقابات تحاسبهم ولا حكومه تقولهم من أين لك هذا ولا بتعملوا في موظفينكم وعمالكم ايه؟ وماحدش هايقولهم فين التأمين الصحي والتأمينات والحد الأدنى للأجور والحق في الأجازات وكل وجع الدماغ ده...كمان مش هايقدروا يمارسوا هوايتهم البذيئة في انهم يمضوا الموظف الجديد على إستقالته قبل ما يشتغل علشان يمشي على العجين ما يلخبطوش...تفتكروا دول يبقوا إيه لو عارضوا جمال مبارك؟؟ انا لو شفت واحد منهم بيعارض جمال هاطالب بشنقه بتهمة الغباء الإقتصادي!

*ما تفتكروش ان المنافق بينافق لمجرد مكاسب لحظية أو علشان ينط على كتاف غيره...المنافق في بلد زي دي هو أذكى إخواته وأنصح شباب بلده...ده الوحيد اللي بيطلع الدهب من المزابل...والوحيد اللي بيحول الميه لبترول...والوحيد اللي بيمسك المشط ويحول الوش العكر لوش صبوح...وكل اللي حواليه بيبقوا مذهولين من قدرته العجيبة على تغيير مواقفه وتنضيف الجزم الوسخه لحد ما تشوف صورتك فيها من كتر اللمعان...ولما بيكمل من غير غلطات بيبقى أقوى من الوزير وأحياناً رئيس الوزراء كمان...المنافق في بلدنا مش شخص شرير...الشيخ والكاهن وموظف الحكومه والعامل والفلاح والشباب العاطل مش أشرار بالمطلق...بس حط نفسك مكانهم...تستفيد من الوضع القائم وتعيش حياة كريمة بأي وسيلة والمقابل إنك تدافع عن الناس اللي وصلوك لأنك تبقى كده...ولما بتتعود على الوضع ده مش بتقدر تغيره لأن اللي تعرفه أحسن من اللي ماتعرفوش...وبعدين في النهاية ذنوبك دي كلها هاتضيع في حجه ولا صلاة ولا قراية قرآن ولا إعتراف ولا تبرع...وهاتكسب الدنيا والآخره وإنتا قاعد زي الباشا...لكن لو جالك واحد بيقولك نكافح علشان نغير ومايبقاش في فساد وكل مصالحك تخلص قانوني ويبقى في ديموقراطية وحرية وعلمانية هاتقوله طيب انا هاستفاد إيه؟ هاكسب من وارا ده كله إيه؟ هاضمن منين انك تعيشيني زي مانا اتعودت اني اعيش دلوقتي؟

*مين قال إن الديموقراطية مناسبه للجهل والغباء والتطرف والنفاق اللي هما أغلبية دلوقتي؟

*إعذروني يا إخوانا على التدوينة العجيبة دي اللي ماحدش متعودها مني...بس ما تستغربوش لما تلاقوا تأييد جمال مبارك من فئات شايفه وعارفه وعايشه في المهزله اللي إحنا فيها دي...الناس دول مش أغلبهم مضحوك عليهم...لكن هما دول اللي بيضحكوا بيهم على الناس