الخميس، ٥ يوليو ٢٠١٢

آخر عصور العشق


تعلمين جيداً أن ما بيننا يفوق قدرتي على الوصف...تعلمين أنه لا سبيل للعوده...وتذكري مثالي عن الجنود السوفييت الذين كانوا يُدفعون دفعاً للخطوط الأمامية دون سلاح ليصدوا هجوم النازي...وكانت نتيجة إنسحابهم الموت بالرشاشات السوفيتية نفسها, تذكري أننا مفارقون بعضنا البعض دون أمل...وأن ماضينا قد نتكىء عليه يوم نشيخ إما ليساعدنا على تحمل معاناتنا أو ليعجل من نهايتنا.

تذكري أننا لو إستمرينا قد نكره بعض, قد تتشوه الذكريات...قد تتوه التفاصيل...قد ننسى أجمل لحظاتنا في خضم الملل, تذكري أننا قد نفترق الآن ولكننا أصدقاء...ولو كنا إستمرينا لربما إفترقنا أعدا...أعلم أن "ربما" هنا لا محل لها من الإعراب...فربما أكملنا قصتنا على أكمل وجه كما بدأناها...وربما تنتهي قصتنا نهاية سعيدة مغلفه بالحزن عندما يترك الدنيا أحدنا وهو بين يدي الآخر, لكن مواساة الموقف تحتم علي توقع السيء.

قد يبدو الكلام مبتذلاً...حتى العنوان نفسه قد يوحي بالسطحية...لكني لا أكتب لكِ...ولا أكتب لهم...ولا أكتب لمن يقرأ لأنه لن يجد الجديد...أكتب لأنني أود تسجيل تلك اللحظه الفارقه في حياتي...إنني لا أعلم حتى إن كانت فارقه في حياتك أيضاً...لكنها بالنسبه لي كمن تجاوز المدى لسدرة المُنتهى ثم عاد ليحكي عما رآه فما صدقه مستمع.

تخيلت يوماً أنني سأغفو للأبد منتظراً جنتي...وعندما أفقت على الحقيقة المُرة تمنيت لو لم أفق يوماً...لكني لن أنكر الآن الجنة...فقد دخلتها وعشت فيها وما طلبت شيئاً إلا وجدته...كنت أقول لكِ كوني فتكوني...وكانت أنوثتك تطغى فأكون قبل أن تنطقيها...لكنها الإفاقة مره أخرى...ومره أخرى أفقد أمل ما بعد الحياة...فما هي حياتي بعدك إلا موت.

قد أكون مُبالغ في كل حرف بداية من العنوان حتى وصفي لنفسي بالمبالغه...قد تقولين لنفسك هو يتلذذ بتعذيبي وتعذيبه وإكتساب شفقة الآخرين...قد أقول لنفسي أن الموقف لا يستدعي تحويله لمآساة...فهي ليست الأولى ولن تكون الأخيرة...لكن هل تعلمون أن الإقتناع إجبار وليس إختيار؟ فإذا كنتم مجبرون على الإقتناع فكيف تطلبون مني أن اختار ألا أعاني من إقتناعي أنها خط النهاية لآخر عصور عشقي؟

أغسطس 2010

الاثنين، ٢٧ فبراير ٢٠١٢

حملة إعرف نفسك


دي مجموعة تويتات بدأتها بحملة لتعريف يعني إيه تبقى عنصري أو طائفي أو متعصب وإتحولت لنوت بعد ما أخدت زخم كويس على تويتر...وقريب هاتتحول لصفحة على الفيسبوك...أتمنى تعجبكم وتشاركوا بأفكاركم:
§  ·       أول ما تقول إن مصر عبارة عن مسلمين ومسيحيين وتسكت إعرف إنك عنصري وطائفي فورا.

§  أول ما تقول إنك متسامح لدرجة إنك بتحب المسيحي زي المسلم إعرف إنك عنصري وطائفي فورا.


§  ·       أول ما تبتدي تشتم في اليهود لأنك بتكره إسرائيل إعرف إنك عنصري وطائفي فورا.

§  أول ما تلاقي نفسك بتقول إن أعز أصدقائك من الطفولة مسيحيين علشان تنفي عن نفسك تهمة إنك بتكرههم إعرف إنك عنصري وطائفي فورا.

§  أول ما تلاقي نفسك بتقول إن ماعندكش مشكلة مع البوذيين والبهائيين بشرط إنهم ما يبنوش معابدهم في مصر إعرف إنك عنصري وطائفي فورا.


§  أول ما تلاقي نفسك بتقول إن من حق الأغلبية فرض رأيها على الأقليات بالديموقراطية إعرف إنك عنصري وطائفي وديكتاتوري.

§  أول ما تلاقي نفسك بتقول إن اللي بيغير دينه منافق بس لو غير دينه وبقى نفس دينك ربنا هداه إعرف إنك عنصري وطائفي فورا.


§  أول ما تلاقي نفسك بتقول المسلم والمسيحي إيد واحده وإنهم عنصري الأمه إعرف إنك عنصري وطائفي فورا.

§  أول ما تلاقي نفسك بتقول إن المرأه ليها حقوق زيها زي الراجل بس مش في كل حاجه إعرف إنك عنصري فورا.


§  أول ما تلاقي نفسك بتقول إن المساواة بين الراجل والست لا جدال فيها ماعدا شوية حاجات ماينفعش فيها المساواة اعرف انك عنصري فورا.

§  أول ما تلاقي نفسك بتقول الست مالهاش إلا بيتها وجوزها إعرف إنك عنصري وهمجي فورا.


§  أول ما تلاقي نفسك بتقول إنك ماعندكش مشكلة مع اللي بشعرها بس الحجاب دليل الإحترام والحشمه والوقار إعرف إنك عنصري وطائفي فورا.

§  لو لقيت نفسك بتدافع بإستماته عن حقوق المرأه وفي نفس الوقت مبهدل أختك علشان عرفت إنها بتحب إعرف إنك عنصري ومنافق فورا.


§  لو كنت مصاحب بنت وكل يوم بتخرج معاها ومقضيها وعايش حياتك بس في نفس الوقت ماتقبلش ده على أختك إعرف إنك عنصري ومنافق فورا.

§  أول ما تلاقي نفسك بتختار زوجتك على أساس إنها هاتبقى أم العيال وهاتشوف شغل البيت كويس إعرف إنك عنصري فورا.


§  لما تشوف ان ماينفعش ان يبقى رئيس مصر سيدة او حتى مديرتك فى الشغل ست إعرف انك عنصرى فورا.

§  أول ما تلاقي نفسك بتقيّم اللي قدامك على حسب درجة تدينه مش أخلاقه ولا شخصيته إعرف إنك عنصري وطائفي فورا.


§  أول ما تلاقي نفسك بتدافع عن واحد عاكس بنت علشان لبسها أو مكياجها أو طريقة مشيتها إعرف إنك عنصري فورا.

§  أول ما تكره اللي يسيب دينك ويتحول لدين تاني وعايز تعقابه وفي نفس الوقت بتحتفل باللي بيسيب دينه وييجي دينك اعرف انك طائفي فورا.


§  أول ما تلاقي نفسك مؤيد للدعوه لدينك في اي مكان في العالم وفي نفس الوقت ضد ان حد يدعوا لدينه في بلدك اعرف انك عنصري وطائفي فورا.

§  أول ما تشتكي من الإضطهاد بره بلدك علشان مش عارف تبني جامع أو تصلي في الشارع وبتعمل نفس الفعل مع أهل بلدك اعرف انك طائفي فورا.


§  أول ما تلاقي نفسك بتجبر مراتك أو أختك او بنتك على الحجاب وفي نفس الوقت بتقول ان الدين مش بالإجبار اعرف إنك عنصري ومنافق.

§  أول ما تلاقي نفسك بتسأل اهلك وصحابك وزمايلك في رمضان (إنتا صايم ولا لأ؟) إعرف إنك متعصب ومنافق وسطحي فورا.


§  أول ما تلاقي نفسك بتعاكس البنات عاطل على باطل وأول ما تسمع الآذان تقول لزميلك يالا علشان ناخد ثواب الجماعه إعرف منافق وبوشين.

§  أول ما تلاقي نفسك بتقول على اللي بيشربوا خمرة كفار علشان بيعملوا الحرام وتيجي ضاربلك سيجارتين حشيش وشاقط مومس اعرف انك منافق فورا.


§  لما ترد على سلام عليكم وماتردش على مساء الخير أعرف انك عنصري فورا.

§  لما تتريق على طقوس المسيحيين واليهود والبهائيين والبوذيين وتعمل مظاهرات لما حد يتريق على طقوسك اعرف انك عنصري وطائفي فورا.


§  أول ما تقول أن الشهادة لغير  الله هى مش شهادة من غير ماتفكر أزاى ترجع حق اللى مات أعرف على طول أنك جبان و منافق فورا.

§   لما تعمل نفسك وطنى و تقول الله يخرب بيت الثورة أعرف على طول أنك عبد و كانت عجباك عيشة العبودية.


§  لما تلاقي نفسك بتعتبر ديانات ومذاهب غيرك كفر وضلال وتزعل أوي لما حد يقول على ديانتك ومذهبك كده إعرف إنك عنصري وطائفي فورا.

§  لما تنتقد ديانات غيرك وتسخر منها علشان مش سماوية وشايف إنها خرافية وتزعل لو حد قال على دينك كده إعرف إنك عنصري وطائفي فورا.


§  لما تقول على كتب الديانات الأخرى محرفه ومن صنع البشر ومليانه تخاريف وتزعل لو حد قال كده على كتاب دينك إعرف إنك عنصري وطائفي فورا.

§  أول ما تلاقي نفسك بتتجوز علشان تجيب واحده تخدمك وتخلفلك عيال ويبقى حلال معاها الجنس اعرف انك عنصري فورا.


§  أول ما تلاقي نفسك بتطالب بحرية ممارستك لدينك وسط أغلبية مش من دينك وفي نفس الوقت بتطالب بقتل الملحدين اعرف انك عنصري وطائفي فورا.

§  لما تلاقي نفسك بتسخر من معجزات الديانات الأخرى وفي نفس الوقت بتهاجم أي حد بيقول على معجزات دينك خرافات اعرف انك عنصري فورا.


§  أول ما تلاقي نفسك بترفض 99.9999% من الأديان و تختار واحد بس ويبقي نفسك تقتل اللي رفض 100% منهم اعرف انك طائفي فورا.

§  لما تلاقي نفسك بتسخر من زي الرهبان المسيحيين والحاخامات اليهود وبتزعل لما حد يسخر من الجبه والقفطان اعرف انك طائفي وعنصري فورا.


§  لما تلاقي نفسك بتسخر من فتاوى الأديان الأخرى وبتزعل لما حد يسخر من فتاوى دينك إعرف إنك عنصري وطائفي فورا.

§  لما تلاقي نفسك ماسك سبحه وسواك وبتقرا قرآن وبتضايق من اللي يلبس صليب ويقرا الإنجيل مثلا إعرف إنك عنصري وطائفي فورا.


§  لما تلاقي نفسك بتقول على السُمر بوابين وعلى الآسيويين خدامين وعلى الأوروبيين مش رجاله وستاتهم مومسات إعرف إنك عنصري فورا.

§  لما تقول على واحد شكله فقير ولبسه مش ولابد إنه بلطجي أو سوابق من مظهره تبقى عنصري فورا.


§  لما تشوف بنت بتشرب شيشة وتعتبرها مش متربية وإنتا في بقك لي الشيشة بتاعتك تبقى عنصري ومنافق فورا.

§  لما تقول إنك هاتسمح للآخرين بممارسة شعائر دينهم إعرف إنك عنصري وطائفي فورا.


§  لما تلاقي نفسك بتحرم على أختك ولا مراتك ولا بنتك انها تخرج لوحدها وانتا بترجع كل يوم الفجر وبتبات بره إعرف إنك عنصري ومنافق فورا.

§  لما تتريق على ان الهنود أغبيا أو السمر بدائيين أو الأوروبيين باردين وتزعل لو حد اتريق عليك وقال انك عربي بدوي اعرف انك عنصري فورا.


§  لما تقول للصغير يحترم الكبير وفي نفس الوقت تأيد إن الكبير يضرب الصغير علشان يتربى اعرف انك عنصري وهمجي فورا.

§  لما تلاقي نفسك بتعاكس أي أنثى في الشارع وتتحمأ أوي لو حد عاكس بنتك أو مراتك أو أختك إعرف إنك منافق وبوشين فورا.


§  لما تقول إن فلان مسيحي بس كويس أو علانه ست بس شايفه شغلها وبتفهم إعرف إنك عنصري وطائفي فورا.

§  لما تعامل الأطفال بمنتهى العنف بحجة انهم لازم يتربوا وفي نفس الوقت بتعاقبهم على إنطوائهم الزايد أو شقاوتهم الزايدة تبقى همجي فورا.


§  لما تتجوزي راجل علشان تجيبي منه عيل وعلشان يصرف عليكي ويبقى ضل راجل ولا ضل حيطه تبقى عنصرية ضد نفسك.

§  لما ترضي تفضلي دايما في المرتبة التانية وماعندكيش شخصية ولا راي وإستقلال مادي وموافقه إنك تبقي تابعه اعرفي انك عنصرية ضد نفسك.


§  لما ترضوا يتقال عليكم ماتنفعوش للرئاسة علشان الدين والجنس وتسكتوا على حقوقكم الدستورية والإنسانية إعرفوا إنكم عنصريين ضد نفسكم.

§  لما تقول إنك عمرك ما قرفت من أكل جارك المسيحي إعرف إنك عنصري وطائفي فورا.


§  لما تعمم صفه أو صفات على أتباع دين أو شعب أو عرق أو جنس إعرف إنك طائفي وعنصري فورا.

§  لما تحكم على إنسان إنه مش شخصية كويسه من لبسه أو طريقة كلامه أو مستواه المادي والإجتماعي إعرف إنك عنصري وطبقي فورا.


§  لما تقول لحد (أترضاه لأختك؟) إعرف إنك عنصري فورا.

§  لما تتفاخر إن كلمتك في البيت ماشيه وإن مراتك مش بتقدر ترفع عينها في عينك إعرف إنك عنصري وهمجي فورا.


§  لما تفرض على مراتك تتحجب أو تتنقب وفي نفس الوقت تلبس إنتا أحدث موضة وتتشيك وتصرف على مظهرك بذمه إعرف إنك عنصري فورا.

§  لما تتعمد تتكلم عن إن أتباع دينك ومذهبك هايدخلوا الجنه والباقي لأ قدام حد مش من نفس دينك أو مذهبك إعرف إنك عنصري وطائفي فورا.


§  لما تفتخر بأصلك وفصلك إللي مالكش يد فيه وتحتقر إللي أقل منك إعرف إنك عنصري وطبقي فورا.

§  لما تفترض ان سمر البشرة ما ينفعوش يبقوا طيارين أو علماء أو دكاترة لأنك بتعتبرهم أقل من البيض إعرف إنك عنصري فورا.


§  لما تفترض إن البنت ماينفعش تبقى في كفاءة الراجل أو ماينفعش تشتغل في وظائف معينه بيشتغلها الراجل إعرف إنك عنصري فورا.

§  لما يكون ردك (علشان انا راجل ومش عيب أعمل كذا) إعرف إنك عنصري فورا.


§  بصفة عامه لما تحب اى انسان علشان سبب غير ان هو انسان اتاكد واعرف انك عنصرى فورا.

الأحد، ٢٩ يناير ٢٠١٢

ملخص تاريخ الخزي والعار الإخواني

قبل الثورة عمرهم ما هتفوا بسقوط مبارك...عمرهم ما نظموا إضراب عمالي...كانوا بيعتقلوا زيهم زي غيرهم...ودايما كانت مواقفهم السياسية براجماتية ونفعية.

بعد الثورة تاريخهم المخزي حافل بالمواقف الغير وطنية والغير ثورية والمليئة بالإنتهازية والقذارة والخروج على الإجماع الثوري.
رفضوا ينزلوا يوم 25 يناير...رفضوا يتضامنوا مع اللي نزلوا وعملوا طرش وعمي وخرس...نطوا على موقعة الجمل ونسبوها لنفسهم بالتزوير والبراجماتية .

اول ناس قعدوا مع عمر سليمان...اول ناس طالبوا بالإصلاح والتهدئه...طلبوا مننا نخلي الميدان وندي مبارك فرصه لسبتمبر طبقا لاتفاقهم مع سليمان.

فضلوا يضغطوا على الثوار لحد ما الميدان اجبرهم ينصاعوا...احتفلوا معانا ب11 فبراير وايديهم ملطخه بالسلام على عمر سليمان...وكانوا موافقين على شفيق.

هاجموا وجود بعض المعتصمين بعد التنحي...هاجموا ظباط 8 ابريل وخونوهم وارشدوا عنهم بواسطة كلبهم صفوت حجازي.

ساندوا وساعدوا ووقفوا جنب شرف ووزراته لآخر نفس رغم مساوئه الرهيبة...طنشوا على مجزرة ماسبيرو كانها لم تكن ونسيوا يتضامنوا.

سابوا اهالي الثوار يوم 18 نوفمبر لحد ما اتطحنوا لوحدهم السبت 19 نوفمبر...رفضوا ينزلوا مجازر محمد محمود وقالوا على الشباب الثوار طرف تالت وبلطجية.

وقفوا ضد اغلب الاعتصامات وعمرهم ما هتفوا بيسقط حكم العسكر...وافقوا على قانون تجريم الاعتصامات ووقفوا ضد الاضرابات العمالية.

سابوا شباب مجلس الوزرا يتدبحوا في سبيل البرلمان وماتضامنوش مع الضحايا واولهم ست البنات وغيرها...وقفوا ضد الثوار وبرروا جرايم العسكر.

خالفوا كل الثوار والمتضامنين معاهم في ذكرى 25 يناير واصروا على الاحتفال ورفضوا الهتاف بسقوط حكم العسكر وبعتوا برقية شكر وتهنئة لسفاحين المجلس.

من اوائل الناس اللي هتفوا الجيش والشعب ايد واحده...ماعملوش مره واحده مسيرة تضامنية مع اللي بيتحاكموا عسكريا...خونوا رفاق الثورة.

خالفوا كل القوانين في الانتخابات في سبيل الكراسي...قطعوا وعود عن المشاركة لا المغالبه ونقضوها كلها بالكدب والتلفيق والتزوير.

اعلامهم من اول رصد مرورا بقناة 25 مصر وحتى جريدتهم اعلام كاذب وملفق وغير حيادي وبيتبنى نفس الخطاب الحكومي العسكري.

ماعملوش ولا حركة واحده مساندة لحقوق العمال والفلاحين واللي بيتحاكموا عسكريا...مانزلوش التحرير الا علشان مصلحتهم حتى لو ضد الثورة.

دعموا الإستفتاء علشان مصلحتهم وحولوه لإستفتاء على الدين وفي الآخر كان خراب على مصر والثورة...خونوا كل اللي وقف ضد الاستفتاء.

تفننوا في إطلاق التصريحات المستفزة والعدوانية والعنصرية والطائفية...تحالفوا مع السلفيين في الاول لحد ما وصلوا للإنتخابات وقلبوا عليهم.

اقصوا شبابهم لما وقفوا مع الثورة والثوار وطردوهم من جماعتهم...طردوا اي حد من الجماعه ينضم لحزب غير حزبهم...اجبروا الشباب الشريف ينسلخوا منهم.

خطابهم بيخلط السياسة بالدين لصالح مكاسب سياسية...مرشدهم كان موافق على رئيس ماليزي مسلم ومش موافق على رئيس مصري مسيحي.

مرشدهم كان بيتمنى يقابل مبارك وكان موافق على جمال مبارك...اشتركوا في مسرحية انتخابات 2005 في سبيل 88 كرسي...كانوا موافقين على وجودهم كفزاعه.

ماعندهمش مشكلة ان المجلس العسكري ما يتحاسبش على جرايمه...رفضوا وصف الخروج الآمن لأنه إدانة للعسكر وكانوا عايزين يكرموهم.

اول ناس حولوا الميدان لمقلب زبالة يوم جمعة قندهار...اول ناس حولوا الميدان للدعاية الانتخابية البرلمانية...اول ناس حولوا الميدان للطائفية بهتافاتهم.

تحالفوا مع الملك فارق ومع محمد نجيب ومع عبد الناصر ومع السادات ومع مبارك...باعوا الوطن في سبيل مكاسب سياسية واقتصادية.

وقت عبد الناصر رفعوا شعارات الإشتراكية...وقت السادات نطوا على الإنفتاح وتحالفوا مع راس المال الإنتهازي...مع مبارك احترفوا غسيل الاموال والنصب.

تاريخهم دايما مليان تحالفات مع السلطة وتربيطات تحت الترابيزة وصفقات مشبوهة...ونفع واستنفع وعمرهم ما اخدوا مواقف وطنية الا لمسايرة الموجه.

استغلوا جهل الناس وفقرهم ومرضهم وذلوهم بلقمة العيش...كانوا بيحفظوهم قران وعمرهم ما عملوا محو امية لان لو الناس فهمت هاتكرههم.

خرجت من تحت عبائتهم كل الحركات الاسلامية الارهابية المتطرفة من اول الجماعات الجهادية في السبعينات مرورا بالقاعدة وفروعها لحد دلوقتي.

اول ناس باعوا اللي دافعوا عنهم لما خونوا اليسار والاشتراكيين الثوريين اللي وقفوا مع قياداتهم لما اتحاكموا عسكريا...النداله جزء من سياستهم.

عمرهم ما نزلوا الشارع بمظاهرات ضد الحاكم ايا كان...عمرهم ما واجهوا الرصاص بصفتهم الاخوانجية لكن كانوا فنانين في اطلاقه.

اللي بينشقوا عنهم دايما كانوا بيحكوا عن انانيتهم وانتهازيتهم ومواقفهم المخزية وانعدام وطنيتهم واستعدادهم لبيع الوطن في مقابل الدين.

لما عملوا حزب سياسي كانت ممارسته اكثر ديكاتورية من النظام السابق...قياداتهم ماعندهمش مشكلة يبيعوا شبابهم في سبيل مكسب سياسي حزبي.

قيادتهم خونوا اي حد يقعد مع مسئول او حتى ممثل لجهة اجنبية...وهما كانوا اول ناس جريوا يقعدوا مع الامريكان والاوروبيين.

اول ناس باعوا الثورة والميدان لما نزلوا الانتخابات البرلمانية بكل تقلهم وخالفوا قوانينها وزوروها علشان ينقلوا الشرعية من الثوار للبرلمان.

ارهبوا المصريين بالدين...اجبروا البنات يتحجبوا بالمضايقات والمعاكسات والشتايم في الشارع...خونوا العلمانيين وكفروا الشيوعيين وارهبوا المفكرين.

حولوا المراه لعورة...اجبروا البنات يتكسفوا من انوثتهم...طلعت فتاوي عدم الاختلاط وتحريم العمل للستات ونشروا النقاب والزي الباكستاني.

وقفوا بالمرصاد للفن والادب والشعر...خطابهم في اي برلمان كان بخصوص مشهد في فيلم ولا مقطع من اغنية ولا صفحة من كتاب...كارهين للفن والحياة.

قتلوا فرج فوده بفكرهم قبل رصاصهم...حاولوا يقتلوا نجيب محفوظ,هددوا مبدعين ومفكرين...قوموا الناس البسيطة على الادباء والفنانين بحجة انهم كفرة.

قالوا الدين قبل الوطن...قالوا الاجنبي المسلم فوق المصري الغير مسلم...كفروا غير المسلم السني,نسيوا ان الدين لله والوطن للجميع وافتكروا مصلحتهم.

قالوا عايزين فن مؤدب يراعي العادات والتقاليد والدين ونسيوا ان الفنون جنون وان الفنان مالوش كاتالوج وان عبقرية الفن في عشوائيته وانطلاقه.

قياداتهم مليونيرات ومليارديرات...مقرهم الرئيسي ب19مليون جنيه في دولة 80%من سكانها فقرا...مصادر اموالهم غير معروفه ورافضين تتراقب.

وظيفتهم في عهد مبارك كانت انهم يوجهوا الناس لقضايا فرعية تافهه اغلبها متعلق بشكليات الدين والتقاليد علشان يبعدوهم عن مصايب نظام مبارك.

يوم ما فكروا يعملوا حزب سياسي سرقوا الإسم من حركة شباب من أجل العدالة والحرية (العدالة والحرية) اللي انا عضو فيها وكلمناهم ورفضوا يتنازلوا.